ថៃ៖ អគ្គីភ័យឆាបឆេះនៅផ្សារអណ្តែតទឹកប៉ាតាយ៉ា ដែលជាកន្លែងទាក់ទាញទេសចរណ៍មួយស្ថិតក្នុងខេត្ត ឈុនបុរី ប្រទេសថៃ កាលពីវេលាម៉ោង ៨យប់ នាថ្ងៃទី៧ ខែកញ្ញា នៅសល់តែដំបូល និងសសរប៉ុណ្ណោះ។

យោងតាមសារព័ត៌មាន Khoasod English ឱ្យដឹងថា រថយន្តពន្លត់អគ្គិភ័យជាង ២០គ្រឿង ត្រូវបានបញ្ជូនមកបាញ់ពន្លត់ ប៉ុន្តែពិបាកក្នុងការពន្លត់ ព្រោះតំបន់នោះភាគច្រើនធ្វើពីឈើ ខណៈដែលតំបន់នេះមានភ្លៀងធ្លាក់ខ្លាំងដោយមានសំឡេងផ្ទុះពីមួយពេលទៅមួយពេល។

ក្រុមពន្លត់អគ្គីភ័យអាចគ្រប់គ្រងអគ្គីភ័យនេះបាននៅវេលាម៉ោង ១០យប់ ខណៈមន្ត្រីជំនាញនៅតែប្រើទឹកបាញ់ពន្លត់ដើម្បីកុំឱ្យអណ្តាតភ្លើងឆាបឆេះឡើងវិញ ចំណែកមូលហេតុនៃការឆាបឆេះមិនទាន់បានដឹងថាបណ្តាលពីអ្វីនៅឡើយ ឯការខូចខាតនឹងពិនិត្យបន្ថែមទៀត។

ប្រភពដដែលឱ្យដឹងថា បុគ្គលិក និង អាជីវករផ្សារខ្លះលោតចូលទឹកដើម្បីគេចចេញពីអណ្តាតភ្លើងនៅពេលនោះ ដោយមិនមានអ្នករងរបួសធ្ងន់ធ្ងរទេ។

អភិបាលក្រុងប៉ាតាយ៉ា និងជាចៅហ្វាយស្រុក Bang Lamung លោក Poramet Ngamphichet បានបញ្ជាឱ្យកិច្ចខិតខំប្រឹងប្រែងពន្លត់អគ្គីភ័យ ខណៈដែលលោក Thawatchai Seethong អភិបាលខេត្ត ឈុនបុរីក៏បានប្រញាប់ប្រញាល់ទៅកន្លែងដើម្បីត្រួតពិនិត្យនាពេលនោះផងដែរ។

គួរឱ្យដឹងដែរថា ផ្សារអណ្តែតទឹកប៉ាតាយ៉ាបានបង្កើតឡើងតាំងពីឆ្នាំ២០០៨ គឺជាកន្លែងទាក់ទាញមាត់ទន្លេនៅប៉ាតាយ៉ា ដែលទីតាំងនោះបានបង្ហាញសហគមន៍រស់នៅតាមដងទន្លេរបស់ថៃបុរាណដ៏ស្រស់ស្អាត និងរបៀបរស់ រួមទាំងវប្បធម៌ និងផលិតផលក្នុងស្រុកមកពីតំបន់សំខាន់ៗចំនួនបួននៃប្រទេសថៃ៕